الخبر الثقافي موقع يهتم بكافة النواحي الثقاقية بمختلف مجالاتها وتغطية الأخبار الفنية .
حوار داخلي
واقف في وسط السكك
ساكك عليك خوفك
خايف أشوفك أو تشوفك
كل القصايد النايمة في سريرك
فوق الملاية اللي من زمان وسخّتها
ساعة الكتابة
والهم الاحمر والهم الاخضر والهم الازرق
والهم اللي مالوش لون
كل يوم بتورّده
ناقص تعبّي أزْمتك فوق جزمتك
وتبعد بعيد
وتجرجر الجرح اللي نازل
من صُرّتك
ياكسْفتك
لما يشوفوك شانق عياْطك
جوه حلق أخْرس مريض
واقف في وسط السكك
باين عليك هاتموت
مع إن نفْس الصدى
لسّه ماصدّاشي
شايل كلامك جوه ضمة لسّه باهتة في الجِبِين
وإزّاي تلين
مع إن كان زيْتك نضيف
يمكن هاترجع
تلسع ببطن جزمتك وش الرصيف
لسّه الرصيف دايس علي وشّك
خايف أخشّك ..
لو مره واحدة شفتني فوق الرصيف
واقف في وسط السّكك
مقتول بإحْساسك
دمّك مغرّق ضحكتي المخنوقة بين خوفك
خايف تلملم
جتت الشعرا الماشيه في عروقك
دا العجْز داس فوق خطوتك
بعْتر صوابعك فوق عنيك
في القنطرة١ والشيخ عمر٢ والحواري المقلقة
لسه ف عنين العيال اللي اتْحنت
تقْطف بواكر حلمها
المرمي علي وش الطريق
لسّاني فاكر
ميّة السلطه اللي بلاش
والبنْطلون اللي ماداب
إلا من كسفته مني
والقميص اللي انا خفت
يقابل صاحبه وهوه لابسني
علشان كده
واقف في وسط السكك
خايف تكون نفسك
خايف تخون نفسك
يبقي كده هاتموت بلاش.
١،٢أحياء في مدينة السنبلاوين
#ديوان_خمس_رقصات_في_جنازتي
