أخبار عاجلة

“مشهد آخر” قصيدة للشاعر “محمود زناتي”

 

#مشهد_آخر

 

في عز البرد …

وصوت النهر …

بخار الماء …

 

وضي الشمس 

بيداعب خطوط الموج 

 

على إستحياء 

 

وقارب من سنين الصبر

 

يتوضى

 

مراكبي وكتفه متعود على الشده 

 

بيسحب رزقه ف شباكه 

 

فتح للعشق شباكه 

 

ف شاور للزمن هدى

 

وطفل بيمسك المقداف 

 

وسارق م الهوى ضحكه

 

بيتعلم أصول الصبر

 

ويجمع حلمه في الشبكه 

 

ويدرس في فنون الصيد 

 

ويرسم بكره ليلة عيد

 

على رغم إن حلمه بعيد

 

بيفرد للأمل سكه

 

وغنوه ملازمه للصياد

 

وصبح جديد 

 

برغم ان الصباح متعاد 

 

بضي الشمس متلون 

 

وبسمه تهدي كل غريب

 

ويا مهون عليه هون

 

على لحن الرضا غنى

 

ويزرع ف الحياه جنه

 

يطوف الدنيا طول مع عرض

 

ويطرح من كفوفه الورد 

 

وانا واقف _ في عز البرد 

 

مستني 

 

بحسه شيء قريب مني 

 

وأحاول أوصف المشهد 

 

وأحاول أرسم الصوره

 

وبكتب ييجي 100 غنوه

 

ألاقي الغنوه مكسوره 

 

مفيش غير الرضا والحب 

 

ولسه الوصف معرفتوش 

 

أتاري لسه في الدنيا 

 

قلوب تانيه 

 

وناس صافيه بوش بشوش

 

تسبح ف الندا والنور 

 

وتحمد ربنا ع الستر 

 

على الصحه 

 

تعيش حمداه

 

وتفتح للرضا الصفحه

 

تسلم أمرها لله