“واحدة بس” قصيدة للشاعر “طارق العمري”

واحدة بس تشوفها تلقى الروح بترقص ف الضلوع

والليالى العتمة بتنور على ضوء الشموع
و الخطاوى الخايفة بتجاسر و تجرى لعندها
ومفيش رجوع

واحدة بس برغم شبعك من نساء الكون جميعا
لما تلمح طرفها تشعر بإنك عشت عمرك كله جوع

واحدة بس تلاقى نفسك عندها وتحس بجوارحك
بتعزف سيمفونية لما تضحك وأما بتخصك بكلمة و لو عادية
انت بتحَمِّلها مليون ألف معنى واسقاطات من كل نوع

واحدة بس ما تنتظرش بداية منها وتبقى عارف
ان ليك جواها وادى من الحنين والشوق مزهزه ف الربوع

واحدة رغم كسوفها دايما نظرة الرمش اللى منهما بتسحرك
و تقول كلام محتاج تعيش جواه خشوع

واحدة بس تحس فيها بربنا
فاتح خزاينه و يمنحك من غير حساب
و تقول يارب ….. دى أحلى تعويض ف الحياة
عن ليل حزين و سنين عذاب
وهاعيش خلاص من غير دموع

واحدة بس بدون ما تكتبلك باحبك
انت عايش قصة الحب الخرافى
والشعور ما صبحش خافى وزهره فتح ع الفروع

واحدة بس بدون ما تذكر إسمها
تلقاه على شراع مركبك محفور على كل القلوع