الخبر الثقافي موقع يهتم بكافة النواحي الثقاقية بمختلف مجالاتها وتغطية الأخبار الفنية .
أنا أحبك.. حاول أن تساعدني!!
——————
عادي
ممكن تبقى الصبح عانيت
قايم بتدور على لقمة تغير ريقك
علشان تمشي في طريقك
قايم بتدور وكأنك في الصحرا
مانزلتش لسه من البيت
لاسكر ولاشاي
ولاجبنة ولاعيش
ولا حتى عندك
نقطة زيت
ولافي بقال
زي زمان يعني
عنده شوية إتيكيت
ح تروح الشغل
تميل على واحد صاحبك
وتقول أنا سايب في البيت كتاكيت
عادي
ماأنت أساسا ياما إديت
وأكيد بتفكر
في إيجار الشقة المتأخر
والعفش إللى اتكسر
فواتير النور والغاز
ودروس الأولاد
والبواب إللى كتير جدا
بتلاحقك نظراته
وكتير منه
اتخبيت
عادى
ماأنت أساسا ياما إديت
أنا عارف ظرفك
ومقدر ضعفك
وسط الأيام إللى بتطحن صنفك
وسط الأيام …..
التيييييييييييييييت
بس ياريت
تقابلني كويس
لو عندك جيت
أو تعذرنى
لو من غير ماأقصد
ع الجرح اتكيت
أو زقيتك في المترو
غصبن عني
أنا زيك برضو
اتزقيت
خلينا نطبطب على بعض
ونحس إننا اخوة
كانت أشيتنا جميعا معدن
دلوقتى صبحت
فتافيت
طب أقولك حاجة
إحنا بنشبه بعض تماما
راح تتأكد صدقنى
لو فى وشوشنا دققت كويس
واتمليت
أو حتى سريعا
لو فى وشوشنا جميعا
بصيت.
