الخبر الثقافي موقع يهتم بكافة النواحي الثقاقية بمختلف مجالاتها وتغطية الأخبار الفنية .
زوزو اللي كان
اسمها في السيما
سندريلا
كانت ملامحها
بتشبه ملامح وش حبيبتك
اللي أخدت الأولي
في مسابقة أحسن ضحكة
من عشرين سنة
ويمكن أكتر
ليه النهارده
بتعيط في الجرنال
ودموعها نزلت
بلّت كل الميادين
اللي وقفت فيها اكتر
من مره تحي الجماهير
وتمضي علي الأوتوجرافات
زي ما تكون ماتت بجد
الناس اللي شافوها
علي الشاشة وتمنوها
“فرسة” أحلامهم
بيتسابقوا النهارده
للمشاركة في شيل النعش
معقول البنت زوزو
هي نفس الجثه اللي
أنا شيلها دلوقت
وبعد ساعات هتكون
مجرد نعي في الجنرال
طب ليه سافرت لبلاد الثلج
وسابت توقيعها وحيد
علي ورقه ملونه
محتفظ بيها في أوراقك
الخاصة لحد الآن
ومستنيها يوم ترجع
فتكمل الجملة الناقصة
في الأوتوجراف
أهي خليت بيك
وفضّلت تموت بدون
أسباب واضحة
وتسبيلك صوتها
في “رباعيات جاهين”
وخفة دمها في
خلي بالك من زوزو
وأصعب مشهد في” الكرنك”
وأحلامها في” الإختيار”
وأجمل ضحكة في الزمن الرايق
ما بقاش منها
غير شوية أخبار مثيره
عن سبب الوفاة
وبيع فستانها وباقي عده
ماكياجها والعربية
ومنديلها الدانتيلا
ودموعها اللي بللت كل الميادين
