الخبر الثقافي موقع يهتم بكافة النواحي الثقاقية بمختلف مجالاتها وتغطية الأخبار الفنية .
الجيب مليان حبة أحلام
و بواقي طموح مش من توبنا
الكف متبت ع الراحلين
و حكاوي كتير مالهاش لازمة
العين مربوطة برهن سلام
أو غمزة تكفر في ذنوبنا
تكسب إنسان تخسر روحك
تكسب روحك تخسر إنسان
حتى جروحك بتكمل بيك
ماهي عمر الأحزان ما تعلم
ولا عمر الضربات هتقويك
المنصب والحب و مالك
جايين على هيئة عقبالك
تعرف مالك؟
حالك سهران يطعن حالك
والموت درجات
تطلع تنزل أهو إسمك مات
عماله تضيق بيك الدنيا
كل ما بتضيق تتنفس خوف
و كفيله الجرعة لكتم الصوت
زعلان كده ليه؟
دنيا و هتفوت
كان عندي زمان شجرة ياسمين
بتضلل على قلبي و روحي
نشفت وسابتني لوحدي حزين
جربت تكون لعبة فإيدهم؟
جربت عينيك تحضن عينهم
ف تحس برود الليل فيهم ؟
ياجميل الكون ده بجد جميل
مش لينا ده بس لمعاليهم
دي بتاخد منك تديهم
أفكار و مشاعر مع أحاسيس
يوم ما هتنقص جواك حاجة
مش هتلاقي حتى التلكيك
عايشين بنكرر ف مشاهد
تشبه بالظبط لفيلم قديم
إتعادلك يجي ألفين مرة
و رياكشن وشك ما اتغيرش
لكن تزعل لو هيفوتك
تتفرج للمرة الألفين
سن الخمسين بتخاف منه
مع إن لابد و هتعيشه
عجزك مسعور سانن سنه
ماسك حلمك ينتف ريشه
و بيعمل منه بيوت ليهم
هتعيش على ذكرى لناس باعت
و كفيلة الدنيا تنسيهم
الحمل تقيل لكن هتشيل
ممنوع ترميه أو حتى تميل
أو حتى تفكر ليه شايل
ياهدير العالم بقى مايل
الشتا بكايه و ليلها طويل
و يارب تعديها جمايل
كان فيها صحاب زيطة ولمة
قاعدين بنفتح في المواضيع
و فأي حوار وقتنا بيضيع
مع فولجا بتكسرها دموعنا
و حكاوي كتير مالهاش مصدر
أسفين العطل من المصدر
جمب الإرسال حزن بيكبر
عمال ينفخ لنا في شموعنا
نرجع و نقول..
خلينا يا ستي ف موضوعنا
و أهي كل المواضيع بتنادي لكل المواضيع
كان قلبي رضيع لسه بيحبي
إتكعبل يومها ف ضحكتها
شوفتي صورتها؟
يخرب بيتها
إزاي قدرت بسهولة تبيع؟!
#احمدالشريف
