” ككل الناس ” قصيدة للشاعر ” فتحي نجم “

ككلل الناس ..بتقسم يومها ع اللوحة
وتتلون مع الأحداث ..وتتعامل
خطوط سايقة الدلال.. ع الوش
سلام كامل..دمار شامل
بتتعامل..
بترسم بكرة مش فايق
وغسلت وشها بالزيف في مصك حنين
وخبّت وردة ف الفُرشة
فندّع قلبها بستان..بينزف بالعياط ياسمين
بتتعامل…..
ولعبت دور ما هوش لايق علي هدومها
وبان في الكادر للفاهمين..بإنه بديل
بتتعامل..
وروحها جفاف…تبان كومبارس
دورها مبتذل وتقيل
ما هيش لايقة في مشهد حد
يعبّر عنها في التمثيل
بتتعامل…
وتحضن روح ما هيش إسهاب
ولا بتأصّل التفاصيل
فا يا بنت التناص ..ف الحظ
ما فيش مُنجز لأفعالك
ودورك فظ
بتتعاملى مع مجانين…بتتلذذ
بدور الهبلة والخايبين
فإن كان الأفيش برنو
فجمهور السراب ملايين
يا بنت الحلم من طينه
يغووور الزيف ولوحاته..وأنّاته
وجناته وملايينه….
فى لحظة صدق شايلة الحلم للجايين
وليه نزرع بوار تايه..في نخل الفقر
ونتعايق بتمر هجين…
يا مين يرمى..
رتوش الصبر ع الكامل
ينادى بسحل ألوانك
وزيف الحمل والحامل
فى روح اللوحة كام فاصل بيتجامل
وهيّة لسة عايشة الدور….
وفُرشتها…بترسم زيف
وتتعامل..وتتعامل..وتتعامل